اسلام آباد میں سپریم کورٹ کی عمارت کے بیسمنٹ میں قائم ملازمین کے لیے مخصوص کینٹین میں گیس سیلنڈر پھٹنے سے 12 افراد زخمی ہوگئے۔ آئی جی اسلام آباد کے مطابق زخمیوں میں سے 3 کو پمز جبکہ 9 کو پولی کلینک منتقل کیا گیا ہے۔ ابتدائی اطلاعات کے مطابق دھماکا اُس وقت ہوا جب اے سی کی مرمت کا کام جاری تھا۔ آئی جی اسلام آباد نے میڈیا سے گفتگو میں بتایا کہ زخمیوں میں 2 افراد کی حالت تشویشناک ہے جبکہ ایک اے سی ٹیکنیشن کا 80 فیصد جسم جھلس چکا ہے۔ واقعہ کی اطلاع ملتے ہی ریسکیو اور امدادی ٹیمیں موقع پر پہنچ گئیں جنہوں نے زخمیوں کو فوری طور پر اسپتال منتقل کر دیا۔ انتظامیہ نے احتیاطی طور پر بیسمنٹ کا حصہ خالی کروا کر داخلی راستے عارضی طور پر بند کر دیے۔ پولیس اور ریسکیو ٹیموں نے علاقے کو گھیرے میں لے کر تحقیقات شروع کر دی ہیں۔