پاکستان پیپلز پارٹی کی معروف رہنما شرمیلا فاروقی نے حال ہی میں فریحہ الطاف کے پوڈکاسٹ میں اپنی اداکاری کے آغاز اور اس شعبے کو پیشہ ورانہ طور پر نہ اپنانے کی وجہ بیان کی۔ شرمیلا فاروقی نے بتایا میں نے اپنا پہلا ڈرامہ اسکول کے دوران کیا تھا اس وقت میری عمر صرف 15 سال تھی اور میں صرف اداکاری آزمانا چاہتی تھی۔ اور اداکاری میں دلچسپی میرے کونونٹ اسکول کے دنوں میں پیدا ہوئی جہاں تعلیمی سرگرمیوں نے اس میں معاونت کی۔ میں نے اپنے والد سے اجازت لی اور اتفاق سے پی ٹی وی اسٹیشن ہمارے گھر کے قریب تھا۔ میرے والد کو پی ٹی وی کے پروڈیوسر حیدر امام رضوی کا علم تھا اور مجھے مرکزی کردار کی پیشکش کی گئی۔ انہوں نے مزید کہا میں نے صرف ایک ڈرامہ کیا کیونکہ اداکاری کبھی میرا کیریئر نہیں تھی۔ میں ابھی بھی اسکول میں تھی اور میرے پاس اتنا وقت نہیں تھا کہ اس پروجیکٹ کے لیے پوری محنت کر سکوں۔ یہ پاکستان کی پہلی پرائیویٹ پروڈکشن تھی جسے عبد اللہ کادوانی نے پروڈیوس کیا اور حیدر امام رضوی نے لکھا۔ اب میں ایک مختصر سوشل ایشو پر مبنی ڈرامہ کرنے کی خواہش رکھتی ہوں جیسا کہ پامال جو جذباتی تشدد کے بارے میں ایک مضبوط پیغام دیتا ہے۔ شرمیلا فاروقی نے سیاست کی مصروفیات کے باوجود اداکاری کے اس پہلو اور معاشرتی مسائل کے لیے اظہارِ خیال کرنے کی خواہش کا اظہار کیا۔