سردیوں کے موسم میں گلیوں اور بازاروں میں بھنی ہوئی مونگ پھلی کی خوشبو ہر کسی کو لبھاتی ہے مگر اکثر لوگ اسے کھاتے وقت اس کے باریک سرخ چھلکے کو الگ کر دیتے ہیں جو حقیقت میں اس کے سب سے زیادہ غذائی فوائد کا حامل ہوتا ہے۔ غذائی ماہرین کے مطابق مونگ پھلی کے سرخ چھلکے میں قدرتی فائبر، طاقتور اینٹی آکسیڈنٹس، وٹامن ای، وٹامن بی 6، پولی فینولز اور فلیوونائڈز موجود ہوتے ہیں جو جسم کو فری ریڈیکلز سے بچاتے، قوتِ مدافعت بڑھاتے اور دل کی صحت کو بہتر بناتے ہیں۔ یہ فائبر نظامِ ہاضمہ کے لیے بھی مفید ہے اور قبض اور خون میں شوگر کی سطح میں اچانک اضافے سے بچاتا ہے۔ ماہرین خبردار کرتے ہیں کہ مونگ پھلی کا حد سے زیادہ استعمال گیس، بدہضمی یا اپھارے کا سبب بن سکتا ہے اس لیے اعتدال کے ساتھ استعمال ضروری ہے۔ الرجی یا معدے کے مسائل والے افراد کو ڈاکٹر سے مشورہ کرنے کا کہا گیا ہے۔ سردیوں میں مونگ پھلی کو اس کے سرخ چھلکے سمیت کھانا زیادہ فائدہ مند ہے کیونکہ اصل غذائیت اور توانائی اسی میں چھپی ہوتی ہے۔