پاکستانی سابق فیشن ماڈل اور اداکارہ ونیزہ احمد نے حال ہی میں اپنی بیٹی کے ساتھ پیش آنے والے خوفناک واقعے کا تفصیل سے ذکر کیا ہے۔ ونیزہ احمد نے یہ واقعہ نجی ٹی وی کے مارننگ شو میں میزبان ندا یاسر کے ساتھ شیئر کیا۔ ونیزہ احمد نے بتایا کہ دو دن قبل ان کی بیٹی چھٹیوں سے واپس آئی تھی اور اسے دھوپ لگنے سے جلن اور خشکی محسوس ہو رہی تھی۔ ان کی بڑی بیٹی عنایہ نے اپنے والد سے یہ مسئلہ بتایا جنہوں نے کہا کہ ناریل کا تیل سب سے بہترین علاج ہے۔ والد نے اپنی والدہ کے گھر موجود ایک آرگینک ناریل کے تیل کی بوتل عنایہ کو دے دی۔ عنایہ نے تیل بڑی مقدار میں اپنے چہرے پر لگایا۔ بعد ازاں یہ معلوم ہوا کہ وہ بوتل دراصل ونیزہ احمد کے شوہر کی بہن کی تھی اور فرنیچر پالش کرنے کے لیے استعمال ہوتی تھی جس میں کیمیکلز کی بڑی مقدار موجود تھی۔ کیمیکلز کی وجہ سے بیٹی کا چہرہ سوج گیا اور زخم بھی آئے۔ فوری طور پر اسے اسپتال منتقل کیا گیا جہاں ڈرپس اور اسٹیرائیڈز دیے گئے کیونکہ کیمیکلز جلد کے ذریعے جسم میں جذب ہو چکے تھے۔ ونیزہ احمد نے واقعے کے بعد والدین کو خبردار کرتے ہوئے کہا کہ بچوں کی حفاظت کے لیے اشیاء کی شناخت اور احتیاط بہت ضروری ہے تاکہ ایسے حادثات دوبارہ نہ ہوں۔