پاک فوج کے شعبۂ تعلقاتِ عامہ (آئی ایس پی آر) کے مطابق 24 مئی 2026 کو جعفر ایکسپریس ٹرین واقعے کے بعد سیکیورٹی فورسز نے بلوچستان کے مختلف اضلاع میں انٹیلی جنس بنیادوں پر متعدد آپریشنز کیے، جن کے دوران 17 دہشت گرد ہلاک کر دیے گئے۔ آئی ایس پی آر کے بیان کے مطابق مستونگ، نوشکی، زہری، خضدار اور کیچ میں کیے گئے آپریشنز کے دوران سیکیورٹی فورسز نے دہشت گردوں کے متعدد ٹھکانوں کو مؤثر انداز میں نشانہ بنایا۔ شدید فائرنگ کے تبادلے میں بھارتی سرپرستی میں سرگرم ’’فتنہ الہندستان‘‘ سے تعلق رکھنے والے 17 دہشت گرد مارے گئے۔ بیان میں کہا گیا ہے کہ ہلاک دہشت گردوں کے قبضے سے اسلحہ، گولہ بارود، بڑی مقدار میں دھماکا خیز مواد اور تیار شدہ دیسی ساختہ بم (آئی ای ڈیز) بھی برآمد کیے گئے۔ سیکیورٹی اداروں کے مطابق ہلاک دہشت گرد علاقے میں متعدد دہشت گرد کارروائیوں میں ملوث تھے۔ آئی ایس پی آر کا کہنا ہے کہ متاثرہ علاقوں میں کلیئرنس اور سرچ آپریشنز جاری ہیں تاکہ باقی ماندہ دہشت گردوں کا خاتمہ کیا جا سکے۔ بیان کے مطابق قومی ایکشن پلان کے تحت وفاقی ایپکس کمیٹی کی منظور کردہ حکمتِ عملی ’’عزمِ استحکام‘‘ کے تحت سیکیورٹی فورسز اور قانون نافذ کرنے والے ادارے ملک سے بیرونی سرپرستی یافتہ دہشت گردی کے مکمل خاتمے کے لیے اپنی کارروائیاں پوری شدت سے جاری رکھیں گے۔