پاکستان ون ڈے کرکٹ ٹیم کے کپتان شاہین آفریدی نے آسٹریلیا کے خلاف سیریز میں فتح کے بعد کہا ہے کہ ہوم سیریز میں ہر ٹیم اپنی کنڈیشنز کے مطابق پچز تیار کرتی ہے اور پاکستان نے بھی سیریز جیتنے کا ہدف حاصل کیا۔ تیسرے ون ڈے میں پاکستان نے آسٹریلیا کو 4 وکٹوں سے شکست دے کر سیریز 1-2 سے اپنے نام کی جبکہ گرین شرٹس نے 158 رنز کا ہدف 42ویں اوور میں حاصل کیا۔ میچ کے بعد پریس کانفرنس میں شاہین آفریدی نے کہا کہ ورلڈ کپ میں ابھی 14 سے 15 ماہ باقی ہیں اس لیے اس حوالے سے بات کرنا قبل از وقت ہوگا۔ ان کا کہنا تھا کہ پچز مشکل تھیں لیکن کھلاڑیوں نے بہتر کارکردگی دکھائی۔ انہوں نے کہا کہ ٹیم میں تسلسل برقرار رکھنے کے لیے زیادہ تبدیلیاں نہیں کی گئیں۔ شاداب خان کی کارکردگی پر سوالات کے باوجود انہوں نے شاندار بولنگ کی جبکہ حارث رؤف کو دو فاسٹ بولرز کے ساتھ کھیلانے کا فیصلہ درست ثابت ہوا۔