گلگت بلتستان میں ہسپر ہوپر گلیشیئر کے پگھلنے کے باعث دریا میں پانی کے بہاؤ میں اضافہ ہوگیا ہے جس پر نیشنل ڈیزاسٹر مینجمنٹ اتھارٹی (این ڈی ایم اے) نے الرٹ جاری کر دیا ہے۔ این ڈی ایم اے کے مطابق ہسپر ہوپر کے مقام پر دریا میں پانی کی سطح میں اچانک اضافہ ہوا ہے تاہم ادارہ صورتحال کی مسلسل نگرانی کر رہا ہے۔ انتظامیہ کو دریا کے کنارے آباد علاقوں میں رہائشیوں کے لیے حفاظتی اقدامات یقینی بنانے کی ہدایت جاری کر دی گئی ہے۔ الرٹ میں کہا گیا ہے کہ ضلع گلگت کے علاقوں بشمول گورو جگلوٹ، رحیم آباد، نومل، جوتل، جگلوٹ کالونی اور چلمش کے رہائشی احتیاط کریں، جبکہ مسافروں کو بھی خصوصی احتیاطی تدابیر اختیار کرنے کی ہدایت کی گئی ہے۔ این ڈی ایم اے نے شہریوں سے اپیل کی ہے کہ وہ تازہ ترین صورتحال سے آگاہ رہنے کے لیے پاک این ڈی ایم اے الرٹ ایپ استعمال کریں۔