وزیراعلیٰ بلوچستان سرفراز بگٹی نے سنڈیمن اسپتال کوئٹہ میں تیزاب گردی کے افسوسناک واقعے کے دوران اپنی جان خطرے میں ڈال کر لیڈی ڈاکٹر ماہ نور کی جان بچانے والے وارڈ بوائے عبدالرزاق ترکئی کے لیے سول ایوارڈ کا اعلان کیا ہے۔ @@3888151@@ وزیراعلیٰ سرفراز بگٹی نے عبدالرزاق ترکئی کی بہادری کی تعریف کرتے ہوئے کہا کہ انہوں نے اپنی جرات اور بروقت کارروائی سے انسان دوستی اور پیشہ ورانہ ذمہ داری کی اعلیٰ مثال قائم کی ہے، اور ایسے فرض شناس افراد قوم کا فخر ہیں۔ انہوں نے واضح کیا کہ عبدالرزاق کی اس جرات مندانہ کوشش کو قومی سطح پر سراہا جائے گا اور حکومت عوام کی جان و مال کے تحفظ سمیت انسانی خدمت کے جذبے کو فروغ دینے والوں کی حوصلہ افزائی کا سلسلہ جاری رکھے گی۔ واضح رہے کہ کوئٹہ کے سنڈیمن اسپتال میں ایک شخص نے لیڈی ڈاکٹر پر تیزاب پھینک دیا تھا، جس سے وہ شدید متاثر ہوئیں۔ متاثرہ خاتون ڈاکٹر کو اسپتال میں ابتدائی طبی امداد فراہم کرنے کے بعد پہلے ایک نجی اسپتال منتقل کیا گیا اور بعد ازاں بہتر علاج اور طبی سہولیات کے لیے ایئر ایمبولینس کے ذریعے کراچی روانہ کردیا گیا۔