پاکستان نے ایک بار پھر دشمن کے ارادے خاک میں ملا دیے۔ وہاڑی، پاکپتن اور اوکاڑہ میں آج چھ بھارتی جاسوس ڈرون مار گرائے گئے، جن میں سے چار اوکاڑہ، ایک وہاڑی اور ایک پاکپتن میں تباہ کیا گیا۔ اب تک کل 35 ڈرونز زمین بوس ہو چکے ہیں۔ سیکیورٹی اداروں کا کہنا ہے کہ یہ تمام ڈرونز اسرائیلی ٹیکنالوجی سے لیس تھے اور ریڈار پر مسلسل نظر رکھی جا رہی تھی۔ جب بھی فضائی حدود میں داخل ہوئے، فوری کارروائی کے ذریعے نشانہ بنے۔ ڈی جی آئی ایس پی آر نے واضح کیا کہ پاکستان کا ایئر ڈیفنس سسٹم جدید اور حساس ہے، جو چھوٹے سے چھوٹے فضائی خطرے کو بھی شناخت کر لیتا ہے۔ شہری آبادی اور کمرشل پروازوں کے تحفظ کے لیے ڈرون گرانے کا خاص طریقہ کار موجود ہے۔ ادھر لائن آف کنٹرول پر بھی حالات کشیدہ ہیں۔ بھارتی فورسز کی بلااشتعال فائرنگ کے جواب میں پاک فوج نے نہ صرف منہ توڑ ردعمل دیا بلکہ کئی بھارتی چیک پوسٹس اور بٹالین ہیڈ کوارٹرز کو بھی نشانہ بنایا۔ ادھر سفارتی محاذ پر بھی آواز بلند ہوئی۔ امریکا میں پاکستان کے سفیر رضوان سعید شیخ نے امریکی میڈیا سے گفتگو کرتے ہوئے کہا کہ بھارت مسلسل تیسرے روز جارحیت کر رہا ہے، جس کے نتیجے میں 30 پاکستانی شہری شہید اور 70 سے زائد زخمی ہوئے ہیں۔ ان کا کہنا تھا کہ پاکستانی عوام اب واضح مطالبہ کر رہے ہیں کہ اس جارحانہ روش پر بھارت کو مؤثر جواب دیا جائے۔