کراچی پریس کلب کے باہر سندھ ایمپلائز الائنس کا احتجاج پرتشدد ہوگیا، مظاہرین کی جانب سے وزیراعلیٰ ہاؤس جانے کی کوشش پر پولیس نے شیلنگ کردی۔
سندھ ایمپلائز الائنس کے عہدیداروں کا مطالبہ تھا کہ تنخواہوں میں 70 فیصد جبکہ دیگر مراعات میں بھی 50 فیصد اضافہ کیا جائے، اگر بات نہ سنی گئی تو پورے سندھ میں احتجاج کیاجائے گا۔
بصورت دیگر سندھ ایمپلائز الائنس کی جانب سے وزیر اعلیٰ ہاؤس یا گورنر ہاؤس کا گھیراؤ کیا جائے گا جس کے بعد ریڈ زون کے چاروں اطراف سڑکوں کو پولیس کی بھاری نفری نے بند کردیا۔
مظاہرین کی جانب سے احتجاج کے لیے وزیر اعلیٰ ہاؤس جانے کی کوشش کی گئی جنہیں اینٹی رائٹ فورس اور آر آر ایف کی بھاری نفری نے دین محمد وفائی روڈ کے قریب روک لیا، اس دوران مظاہرین کو منتشر کرنے کے لیے شیلنگ بھی کی گئی۔