بھارت کی جانب سے پانی چھوڑنے کے بعد دریائے ستلج میں اوکاڑہ کے مقام پر ہیڈ سلیمانکی پر درمیانے درجے کا سیلاب پیدا ہو گیا ہے جس سے نشیبی علاقوں کو خطرات لاحق ہو گئے ہیں۔ فلڈ کاسٹنگ ذرائع کے مطابق دریائے ستلج میں پانی کی آمد 1 لاکھ 4 ہزار 664 کیوسک جبکہ اخراج 98 ہزار 353 کیوسک ریکارڈ کیا گیا ہے، ماہرین کے مطابق پانی کا بہاؤ اسی رفتار سے جاری رہا تو سیلاب اونچے درجے میں داخل ہو سکتا ہے۔ سیلاب کے خدشے کے پیش نظر فلڈ وارننگ جاری کر دی گئی ہے اور دریائے ستلج سے ملحقہ دیہات سے آبادی کے انخلاء کا عمل شروع کر دیا گیا ہے۔ڈپٹی کمشنر احمد عثمان جاوید کی ہدایت پر ضلعی انتظامیہ، ریسکیو 1122، ریونیو، سول ڈیفنس اور دیگر اداروں کوبھی ہنگامی بنیادوں پر الرٹ کر دیا گیا ہے۔ ڈپٹی کمشنر نے تمام اداروں کو ریسکیو اور ریلیف آپریشن تیز کرنے کی ہدایت کرتے ہوئے کہا کہ عوام کی جان و مال کے تحفظ کو ہر ممکن یقینی بنایا جائے۔