قومی اسمبلی کے اسپیکر سردار ایاز صادق نے پاکستان اور سعودی عرب کے درمیان ہونے والے تاریخی دفاعی معاہدے کو دونوں ممالک کے تعلقات کے نئے اور تابناک دور کا آغاز قرار دیا ہے۔ اسپیکر نے کہا کہ وہ پاکستان اور سعودی عرب کے سربراہان اور عوام کو دل کی گہرائیوں سے مبارکباد پیش کرتے ہیں۔ ان کا کہنا تھا کہ پوری قوم وزیراعظم شہباز شریف اور فیلڈ مارشل سید عاصم منیر کی بصیرت اور جرات مندانہ قیادت پر فخر کرتی ہے جن کی کوششوں سے یہ معاہدہ ممکن ہوا۔ ایاز صادق نے کہا کہ سعودی عرب نے ہمیشہ پاکستان کے لیے مخلص دوست اور بھائی کا کردار ادا کیا ہے اور یہ دفاعی معاہدہ اس بھائی چارے اور اعتماد کو مزید مستحکم کرے گا۔ انہوں نے کہا کہ پاکستان کی حکومت اور عوام خادمِ حرمین الشریفین کو قدر کی نگاہ سے دیکھتے ہیں اور مقامات مقدسہ کی حفاظت اور سلامتی میں کردار ادا کرنا اپنے لیے باعثِ اعزاز سمجھتے ہیں۔ اسپیکر قومی اسمبلی نے مزید کہا کہ وزیراعظم شہباز شریف نے سعودی ولی عہد شہزادہ محمد بن سلمان کے ساتھ اعتماد اور بھائی چارے کی نئی بنیاد رکھی ہے جو دونوں ملکوں کے عوام کے مستقبل کے لیے نہایت خوش آئند ہے۔ انہوں نے کہا کہ یہ معاہدہ پاکستان کے دفاع کو مزید مضبوط بنانے اور خطے میں امن و سلامتی کے فروغ کے لیے ایک تاریخی اقدام ہے۔ انہوں نے کہا کہ پاکستان اور سعودی عرب اسلام اور امن کی مشترکہ طاقت ہیں دونوں کا اتحاد ناقابلِ شکست ہے اور رہے گا۔ انہوں نے کہا کہ امتِ مسلمہ کی واحد امید پاکستان ہے اور پاکستان ہر قیمت پر امت مسلمہ کے دفاع اور تحفظ کو یقینی بنائے گا۔