پاکستان تحریک انصاف کے بانی عمران خان نے چیف جسٹس آف پاکستان جسٹس یحییٰ آفریدی کو ایک اور خط لکھا ہے جس میں انہوں نے اپنے اور اہلیہ بشریٰ بی بی کو انصاف کی فراہمی میں رکاوٹوں پر شدید تحفظات کا اظہار کیا ہے۔ ذرائع کے مطابق یہ خط عمران خان کی بہن علیمہ خان نے سپریم کورٹ کی ریسرچ اینڈ انفارمیشن برانچ میں جمع کروایا ہے۔ خط میں مؤقف اختیار کیا گیا ہے کہ وہ گزشتہ 772 دنوں سے تنہائی کی قید میں ہیں اور انہیں 9x11 کے ایک کمرے کو پنجرہ بنا کر قید کیا گیا ہے۔ ان کا کہنا تھا کہ ان پر 300 سے زائد سیاسی مقدمات قائم کیے گئے ہیں۔ خط میں مزید کہا گیا کہ بشریٰ بی بی کی طبی حالت تشویشناک حد تک بگڑ چکی ہے مگر انہیں طبی معائنہ کروانے کی اجازت نہیں دی جا رہی۔ دوسری جانب اسلام آباد ہائیکورٹ میں میڈیا سے گفتگو کرتے ہوئے علیمہ خان نے بتایا کہ انہوں نے چیف جسٹس سے عمران خان اور بشریٰ بی بی کی سزا معطلی کی اپیل کو سماعت کے لیے مقرر کرنے کی استدعا کی ہے۔ ان کے مطابق چیف جسٹس اسلام آباد ہائیکورٹ جسٹس نے کیس 25 ستمبر کو مقرر کرنے کی یقین دہانی کروائی ہے۔