بلوچستان کے ضلع گوادر کے علاقے جیوانی کنٹانی ہور کے ساحلی مقام ماچھی کاپر میںآتشزدگی کے واقعے نے تباہی مچا دی۔ عینی شاہدین کے مطابق آگ صبح تقریباً ساڑھے دس بجے ایک کشتی میں لگی جو دیکھتے ہی دیکھتے دیگر کشتیوں، ڈیزل ڈپوؤں اور موٹر سائیکلوں تک پھیل گئی۔ ذرائع کا کہنا ہے کہ آتشزدگی کے نتیجے میں پانچ سے چھ کشتیاں، دو ڈیزل ڈپو اور 15 سے 20 موٹر سائیکلیں مکمل طور پر جل کر خاکستر ہو گئیں۔ موٹر سائیکلیں عموماً ڈیزل کی ترسیل کے لیے استعمال کی جاتی تھیں۔ ابتدائی اطلاعات کے مطابق آگ لگنے کی وجہ شارٹ سرکٹ بتائی جا رہی ہے تاہم مقامی ذرائع کا کہنا ہے کہ آگ کی شدت اور تیزی کے باعث اس نے پورے ساحلی علاقے کو اپنی لپیٹ میں لے لیا۔ تاحال کسی جانی نقصان کی اطلاع موصول نہیں ہوئی البتہ قیمتی املاک کے بھاری نقصان کا خدشہ ظاہر کیا جا رہا ہے۔