پاک افغان کشیدگی کے باعث ضلع کرم میں خرلاچی بارڈر گزشتہ پندرہ روز سے بند پڑا ہے اور سرحد کے دونوں جانب تجارت اور آمد و رفت معطل ہوکر رہ گئی ہے۔ تاجر رہنماؤں کا کہنا ہے کہ سرحد کی بندش سے تاجروں کو مشکلات کا سامنا ہے اور سرحد کی بندش سے سرحد کے آر پار دونوں جانب مزدور کار طبقہ بھی بے روزگار ہوگیا ہے۔ تاجر رہنماؤں کے مطابق بارڈر کی بندش سے پھنسی مال بردار گاڑیوں میں موجود سبزی فروٹ اور دیگر اشیائے خور ونوش مکمل طور پر خراب ہوگئیں جس کی وجہ سے تاجروں کو کروڑوں روپے کے نقصان کا سامنا کرنا پڑا۔ پاکستان افغانستان سے کپڑا، فروٹ، ڈرائی فروٹ درآمد کرتا ہے جبکہ پاکستان سے افغانستان اجناس، مال مویشی سمیت دیگر خور ونوش کی اشیاء برآمد کی جاتی ہیں۔ پاک افغان شہریوں کو کہنا ہے کہ سرحد کی بندش سے دونوں ممالک کی اشیائے خور ونوش سمیت دیگر اشیا کی نرخوں میں بھی اضافہ ہوگیا ہے۔