جمعرات کے روز مقامی اور عالمی مارکیٹوں میں سونے کی قیمتوں میں کسی بڑی تبدیلی کا مشاہدہ نہیں کیا گیا۔ ملکی سطح پر نرخ بدستور گزشتہ دن کی سطح پر برقرار رہے، جبکہ بین الاقوامی منڈیوں میں بھی سونا مستحکم رہا۔ صرافہ بازار جیولرز ایسوسی ایشن کی رپورٹ کے مطابق پاکستان میں فی تولہ سونا 4 لاکھ 23 ہزار 62 روپے پر برقرار ہے، جب کہ 10 گرام سونے کی قیمت 3 لاکھ 62 ہزار 707 روپے ریکارڈ کی گئی۔ عالمی سطح پر بھی سونے کی قدر میں کوئی خاص حرکت نہیں دیکھی گئی، جہاں فی اونس نرخ 4007 امریکی ڈالر پر مستحکم رہے۔ ماہرین کا کہنا ہے کہ حالیہ استحکام کی بنیادی وجہ کرنسی مارکیٹ میں معمولی اتار چڑھاؤ اور عالمی مالیاتی صورتحال میں جاری غیر یقینی ماحول ہے، جس کے باعث سرمایہ کار محتاط حکمتِ عملی اختیار کر رہے ہیں۔