وفاقی حکومت کی جانب سے پہلے 20 ماہ میں لیے جانے والے قرض کی تفصیلات منظر عام پر آگئیں۔ موجودہ حکومت کے ابتدائی 20 ماہ کے دوران قرضوں میں 12 ہزار 169 ارب روپے کا اضافہ ریکارڈ کیا گیا۔ وفاقی حکومت کے قرضوں میں یہ اضافہ مارچ 2024 سے لیکر اکتوبر 2025 کے دوران ہوا۔ اسٹیٹ بینک آف پاکستان کی دستاویزات کے مطابق مارچ 2024 سے اکتوبر 2025 کے 20 ماہ کے دوران وفاقی حکومت کے مقامی قرض میں 11 ہزار 300 ارب روپے اور وفاقی حکومت کے بیرونی قرض میں 869 ارب روپے کا اضافہ ہوا جس کے بعد وفاقی حکومت کا قرض اکتوبر 2025 تک بڑھ کر 76 ہزار 979 ارب روپے ہوا جبکہ فروری 2024 تک وفاقی حکومت کے قرضے 64 ہزار 810 ارب روپے تھے۔ اسٹیٹ بینک آف پاکستان کی دستاویز کے مطابق فروری 2024 تک مرکزی حکومت کا مقامی قرض 42 ہزار 675 ارب روپے تھا جو اکتوبر 2025 تک بڑھ کر 53 ہزار 975 ارب روپے ہوا۔ اسی طرح فروری 2024 تک وفاقی حکومت کا بیرونی قرض 22 ہزار 134 ارب روپے تھا اور اکتوبر 2025 تک مرکزی حکومت کا بیرونی قرض 23 ہزار ارب روپے سے تجاوز کرچکا ہے۔