پاکستان کرکٹ بورڈ کے گورننگ بورڈ ممبرز نے ملک کے مختلف شہروں میں نئے اسٹیڈیم بنانے اور موجودہ اسٹیڈیمز میں بہتری لانے کی منظوری دے دی ہے۔ میٹنگ میں پی سی بی چیئرمین محسن نقوی نے تمام ممبران کو کرکٹ کے معاملات پر بریفنگ دی۔ حالیہ ہونے والے پاکستان سپر لیگ کی لندن اور نیویارک میں تقریبات، کرکٹ معاملات، ریجن کرکٹ ایسوسی ایشنز کی آزاد آڈیٹرز کے ذریعے جانچ پڑتال، پاکستان ٹیم کی کارکردگی پر بریفنگ دی گئی۔ اجلاس میں نیشنل کرکٹ اسٹیڈیم کراچی کی تعمیر نو کے دوسرے مرحلے کی باضابطہ منظوری دی گئی۔ ایل سی سی اے گراؤنڈ کو اوول گراؤنڈ کی طرز پر اپ گریڈ کرنے کا فیصلہ بھی ہوا۔ بی او جی نے ایل سی سی اے گراؤنڈ کی اپ گریڈیشن کی منظوری بھی دے دی۔ اجلاس میں پی ایس ایل لندن و نیویارک روڈ شوز کی کامیابی پر چیئرمین پی سی بی محسن نقوی اور ٹیم کی محنت اور پروفیشنل ازم کو سراہا گیا، سری لنکن ٹیم کے حالیہ دورہ کو جاری رکھنے کے لیے چئیرمین پی سی بی محسن نقوی کی ذاتی کاوشوں کو خراج تحسین پیش کیا گیا، بی او جی کے ممبران کی جانب سے چئیرمین پی سی بی محسن نقوی سے اظہار تشکر کی قرارداد منظور کی گئی۔ محسن نقوی نے کہا کہ سری لنکن ٹوور کو جاری رکھنے کا کریڈٹ میری ذات کو نہیں بلکہ پوری ٹیم کو جاتا ہے۔ انھوں نے کہا کہ پی ایس ایل کو انٹرنیشنل برانڈ بنانے کے لیے سب نے شبانہ روز انتھک محنت کی ہے۔ انہوں نے کہا پوری کوشش ہے کہ پی ایس ایل 11 کے میچ مظفرآباد اسٹیڈیم میں کرائے جائیں۔ پی او جی کو محسن نقوی نے بتایا کہ مظفرآباد اسٹیڈیم میں انٹرنیشنل میچز بھی کرائیں گے اور اسلام آباد میں اسٹیٹ آف دی آرٹ کرکٹ اسٹیڈیم تعمیر ہوگا۔ بورڈ آف گورنرز کے اجلاس کو مستقبل کے آئی سی سی ویمنز و مینز کرکٹ ٹورنامنٹس کے بارے میں بریفنگ دی گئی، ڈومیسٹک کرکٹ کے ڈھانچے کو مضبوط کرنے اور نچلی سطح پر ٹورنامنٹس اور میچز کی تعداد میں اضافے کے بارے میں بریف کیا گیا۔ بورڈ آف گورنرز کے ممبران اسماعیل قریشی، طارق سرور، سجاد علی کھوکھر، انوار غنی، ظہیر عباس اور تنویر احمد نے اجلاس میں شرکت کی، ظفر اللہ، مصطفیٰ رمدے، عدنان ملک، ایڈیشنل سیکریٹری کابینہ ڈویژن، چیف آپریٹنگ آفیسر پی سی بی سمیر احمد اور چیف ایگزیکٹو آفیسر پی ایس ایل سلمان نصیر، چیف فنانشل آفیسر، ڈائریکٹرز انفراسٹرکچر، ڈومیسٹک کرکٹ، کمرشل اور متعلقہ حکام بھی اجلاس میں شریک ہوئے۔