پنجاب کابینہ نے 16 سال عمر کے نوجوانوں کو ڈرائیونگ لائسنس جاری کرنے کی منظوری دے دی ہے، جس کے بعد اس فیصلے پر عملدرآمد کے لیے قانونی کارروائی کا آغاز کر دیا گیا ہے۔ ذرائع کے مطابق کابینہ کی منظوری کے بعد محکمہ داخلہ پنجاب نے 16 سالہ افراد کو ڈرائیونگ لائسنس جاری کرنے سے متعلق گزٹ نوٹیفکیشن محکمہ قانون کو ارسال کردیا ہے۔ توقع ہے کہ محکمہ قانون پیر کے روز اس حوالے سے باقاعدہ گزٹ نوٹیفکیشن جاری کرے گا۔ مجوزہ قواعد کے تحت 16 سال عمر کا لائسنس ہولڈر صرف موٹرسائیکل چلانے کا مجاز ہوگا اور وہ موٹرسائیکل پر اپنے پیچھے صرف ایک مسافر بٹھا سکے گا۔ فیصلے کے مطابق 16 سالہ نوجوانوں کو موٹرسائیکل رکشہ چلانے کی اجازت نہیں ہوگی اور ان کا لائسنس صرف موٹرسائیکل تک محدود رہے گا۔ حکام کا کہنا ہے کہ اس اقدام کا مقصد نوجوانوں کو قانونی دائرہ کار میں رہتے ہوئے ڈرائیونگ کی سہولت فراہم کرنا اور ٹریفک قوانین پر عملدرآمد کو مزید مؤثر بنانا ہے۔