میئر کراچی مرتضیٰ وہاب نے مسلم لیگ (ن) کے رہنما خرم دستگیر کے بیان پر ردعمل دیتے ہوئے کہا ہے کہ کراچی ایک غریب پرور شہر ہے اور وہ چاہتے ہیں کہ ہنزہ بھی کراچی جیسا بنے۔ مرتضیٰ وہاب نے کہا کہ کراچی ملک بھر سے آنے والے لوگوں کو روزگار اور مواقع فراہم کرتا ہے اور غریب طبقے کی مدد میں اہم کردار ادا کرتا ہے۔ انہوں نے کہا کہ سندھ حکومت مشکل حالات میں عوام کے ساتھ کھڑی رہتی ہے اور سیلاب متاثرین کے لیے 21 لاکھ گھروں کی تعمیر کا منصوبہ جاری ہے، جن میں سے 12 لاکھ گھر متاثرین کے حوالے کیے جا چکے ہیں۔ میئر کراچی کا کہنا تھا کہ عوام کو کھوکھلے دعوؤں کے بجائے عملی اقدامات اور درست حکمت عملی کو ترجیح دینی چاہیے، جبکہ ہنزہ سمیت ملک کے دیگر علاقوں کو بھی کراچی کی طرز پر ترقی اور خدمت کی مثال بننا چاہیے۔ واضح رہے کہ گزشتہ روز ہنزہ میں ورکرز کنونشن سے خطاب کرتے ہوئے خرم دستگیر نے کسی جماعت کا نام لیے بغیر تنقید کرتے ہوئے کہا تھا کہ اگلے 5 سال میں ہنزہ کو کراچی جیسا بنانا ہے یا لاہور جیسا، فیصلہ عوام کو کرنا ہے۔