پرائم منسٹر یوتھ پروگرام کے اسنوکر فوکل پرسن عمران نوشاہی نے صوبائی وزیر کھیل پنجاب ملک فیصل ایوب کھوکھر کو خط ارسال کرتے ہوئے اسنوکر کو سی ایم یوتھ گیمز میں شامل کرنے کی درخواست کر دی ہے۔ خط میں عمران نوشاہی نے واضح کیا ہے کہ اسنوکر کو گیمز کا حصہ بنانے کے لیے وہ اسپورٹس بورڈ پنجاب کے ساتھ ہر ممکن اور مکمل تعاون کرنے کے لیے تیار ہیں۔ خط کے متن میں موقف اپنایا گیا ہے کہ اسنوکر نوجوانوں کے لیے ایک مثبت اور تعمیری سرگرمی ثابت ہوسکتی ہے اور پاکستان نے عالمی و ایشیائی سطح پر اس کھیل میں نمایاں کامیابیاں حاصل کی ہیں۔ انہوں نے بتایا کہ اس وقت پنجاب بھر میں 30 سے زائد اسنوکر اکیڈمیاں نوجوانوں کی تربیت میں مصروف ہیں، جبکہ صوبے کے 10 ہزار اسنوکر کلبز میں 40 لاکھ سے زائد افراد اس کھیل سے منسلک ہیں۔ عمران نوشاہی نے یاد دہانی کرائی کہ 2012 اور 2014 میں بھی پنجاب حکومت کے تعاون سے "یوتھ نیشنل اسنوکر چیمپئن شپ" کا کامیاب انعقاد کیا گیا تھا جس میں کالج، یونیورسٹی اور جنرل پبلک کی کیٹیگریز میں مقابلے کرائے گئے تھے۔ انہوں نے زور دیا کہ اسنوکر کو سی ایم یوتھ گیمز میں شامل کرنے سے نہ صرف نوجوانوں کی صلاحیتوں کو نکھارنے میں مدد ملے گی بلکہ ملک میں اس کھیل کو مزید فروغ بھی حاصل ہوگا۔