ممبئی پولیس نے بالی ووڈ سپر اسٹار سلمان خان کی گاڑی کو بم سے اڑا دینے کی دھمکی دینے والے شخص کو گرفتار کرکے چھوڑ دیا۔ بھارتی میڈیا رپورٹس کے مطابق 2 روز قبل ممبئی پولیس کے واٹس ایپ نمبر پر سلمان خان کو گھر میں گھس کر انہیں جان سے ماردینے اور ان کی گاڑی کو بم سے اڑادینے کی دھمکی دی گئی تھی۔اس کے بعد ممبئی پولیس نے شکایت درج کرکے تحقیقات کا آغاز کیا تھا تاہم اب بتایا جارہا ہے کہ پولیس نے سلمان خان کو دھمکیاں دینے والے شخص کو بھارتی شہر وڈوڈارا سے گرفتار کیا تھا۔26 سالہ ملزم کی گرفتاری نمبر کو ٹریس کرکے عمل میں لائی گئی اور ملزم کا تعلق گجرات سے ہے۔ دوران تفتیش ثابت ہوا کہ ملزم کی ذہنی حالت ٹھیک نہیں جس کے بعد اسے نوٹس جاری کر کے رہا کر دیا گیا۔واضح رہے کہ سلمان خان ان دنوں اپنے خاندان کے ہمراہ ممبئی کے علاقے باندرہ میں گلیکسی اپارٹمنٹس میں رہائش پذیر ہیں،گزشتہ برس سلمان خان کے اسی گھر پر بشنوئی گینگ سے منسلک شوٹرز نے فائرنگ کی تھی جس کے بعد اداکار کے گھر کی سکیورٹی بڑھا دی گئی تھی۔گزشتہ 2 سالوں میں سلمان خان کو 5 ویں مرتبہ جان سے مار دینے کی دھمکی موصول ہوئی ہے۔