وزیرِ اعلیٰ سندھ مراد علی شاہ کی زیر صدارت کراچی کی اندرونی سڑکوں کی تعمیر سے متعلق اجلاس ہوا۔ جس میں صوبائی وزراء سید ناصر شاہ، سعید غنی، جام خان شورو، میئر کراچی مرتضیٰ وہاب، پرنسپل سیکریٹری آغا واصف، کمشنر کراچی حسن نقوی اور سیکریٹری بلدیات وسیم شمشاد شریک ہوئے۔ وزیراعلیٰ سندھ نے شہر کے ترقیاتی کاموں سے متعلق میئر کراچی اور محکمہ بلدیات کو ہدایات دیتے ہوئے کہا کہ حالیہ بارشوں سے کراچی کی اندرونی سڑکیں ٹوٹ پھوٹ کا شکار ہوگئی ہیں، کے ایم سی اور ٹاؤنز محکمہ بلدیات کی نگرانی میں اسکیمیں تیار کریں، شہر کرچی کی تمام سڑکوں کی مرمت یا تعمیر نو کی جائے۔ وزیرِ اعلیٰ نے کہا کہ سڑکوں کے ساتھ نکاسی آب کا نظام بھی بنایا جائے، نکاسی آب کا نظام ہوگا تو بارشوں کا پانی نکل جائے گا اور سڑکیں خراب نہیں ہوں گی۔ میئر کراچی نے بریفنگ دیتے ہوئے کہا کہ کے ایم سی کی ٹوٹی پھوٹی سڑکوں کا سروے کیا جا رہا ہے۔ وزیر بلدیات نے بتایا کہ ٹاؤنز کو اپنے علاقوں میں سڑکوں کے سروے کی ہدایت دی ہے اور سروے تیزی سے جاری ہے، جیسے ہی سروے مکمل ہوگا، اسکیمیں بنا کر منظوری لی جائے گی۔ وزیرِ اعلیٰ سندھ کی محکمہ بلدیات کو ہدایت کی کہ شہر کراچی میں صفائی کے کام کو مزید بہتر بنایا جائے۔