پاکستانی نژاد امریکی اداکار فاران طاہر نے مارول کی دنیا میں طویل عرصے بعد واپسی کرلی ہے۔ وہ مارول اسٹوڈیوز کی سیریز ’ویژن کویسٹ‘ کی چھٹی قسط میں ایک بار پھر اپنے مشہور ولن کردار رضا کے روپ میں نظر آئے ہیں۔ فاران طاہر نے 2008 میں ریلیز ہونے والی فلم ’آئرن مین‘ میں رضا کا کردار ادا کیا تھا جو ٹونی اسٹارک کو اغوا کرنے والے خطرناک کردار کے طور پر سامنے آیا۔ اب تقریباً 18 سال بعد اداکار اسی کردار کے ساتھ واپس آئے ہیں، تاہم اس مرتبہ ان کا حلیہ اور انداز پہلے سے مختلف دکھائی دیتا ہے۔ سیریز کی نئی قسط میں فاران طاہر مسلح ساتھیوں کے ہمراہ ویژن کو پکڑنے کی کوشش کرتے نظر آتے ہیں۔ ان کی واپسی نے مارول کے مداحوں کی توجہ حاصل کرلی ہے، جبکہ پاکستانی نژاد اداکار کی ہالی ووڈ کی معروف فرنچائز میں دوبارہ شمولیت پاکستانی شوبز حلقوں کے لیے بھی قابلِ ذکر خبر ہے۔