"ایک طرف تقریباً 100 میٹر کے فاصلے پر تین شیر موجود تھے اور دوسری طرف میری شیرنی عالیہ میرے سامنے کھڑی تھیں۔ میں گھٹنوں کے بل بیٹھا اور ان سے پوچھا کہ کیا تم مجھ سے شادی کرو گی؟ یہ میری زندگی کے سب سے خوبصورت اور یادگار لمحات میں سے ایک تھا۔" بالی ووڈ کی مشہور جوڑی رنبیر کپور اور عالیہ بھٹ کی محبت کی کہانی میں ایک ایسا دلچسپ واقعہ بھی شامل ہے جس کے بارے میں جان کر مداح حیران رہ گئے۔ رنبیر نے انکشاف کیا ہے کہ انہوں نے عالیہ کو کسی ریسٹورنٹ یا خوبصورت ہوٹل میں نہیں بلکہ افریقہ کے ایک جنگل میں شادی کی پیشکش کی تھی، جہاں کچھ ہی فاصلے پر تین شیر بھی موجود تھے۔ اداکار نے یہ قصہ مشہور ٹی وی شو ’کون بنے گا کروڑ پتی 18‘ میں سنایا، جہاں وہ اپنی فلم ’رامائن‘ کی ٹیم کے ساتھ مہمان بن کر پہنچے تھے۔ رنبیر کے مطابق انہوں نے کینیا کے مشہور جنگلاتی علاقے ماسائی مارا میں عالیہ کو سرپرائز دینے کا منصوبہ بنایا تھا۔ اس مقصد کے لیے وہ پہلے ہی انگوٹھی اپنے ساتھ لے گئے تھے اور اپنے ڈرائیور سے کہہ رکھا تھا کہ کسی مناسب مقام پر گاڑی روک دے تاکہ وہ عالیہ کے سامنے گھٹنوں کے بل بیٹھ کر اپنے دل کی بات کہہ سکیں۔ اس رومانوی قصے میں دلچسپ موڑ اس وقت آیا جب رنبیر نے بتایا کہ شادی کی پیشکش کے دوران تین شیر بھی ان سے کچھ فاصلے پر موجود تھے۔ یہ سن کر شو کے میزبان امیتابھ بچن نے ہنستے ہوئے کہا کہ اتنے یادگار لمحے کا کوئی تصویری ثبوت بھی ہونا چاہیے تھا۔ رنبیر نے اس لمحے کو اپنی زندگی کی حسین یادوں میں سے ایک قرار دیا، جسے وہ کبھی فراموش نہیں کر سکتے۔ یاد رہے کہ رنبیر اور عالیہ کی قربتیں 2018 میں فلم ’براہمسترا‘ کے دوران بڑھیں اور وقت کے ساتھ ان کا رشتہ محبت میں بدل گیا۔ کئی سال ایک دوسرے کو جاننے کے بعد دونوں نے 14 اپریل 2022 کو ممبئی میں اپنے گھر پر ایک نجی تقریب میں شادی کی تھی۔