پاکستانی اداکارہ ہانیہ عامر اور بھارت کے معروف گلوکار و اداکار دلجیت دوسانجھ کی مشترکہ فلم سردار جی 3 گزشتہ روز دنیا کے مختلف ممالک کے سنیما گھروں میں ریلیز کر دی گئی. جن میں پاکستان، برطانیہ، امریکہ، کینیڈا اور مشرق وسطیٰ کے کئی علاقے شامل ہیں۔ یہ فلم ہارر، مزاح اور فینٹسی کے امتزاج سے تیار کی گئی ہے، جس کی کہانی ایک بھوتوں سے بھری پرانی حویلی کے گرد گھومتی ہے۔ دلجیت اس فلم میں ایک ایسے کردار میں نظر آئیں گے جو مافوق الفطرت مخلوقات کا پیچھا کرتا ہے، جب کہ ہانیہ عامر سمیت متعدد فنکار اُن کے ہمراہ اس مہم میں شریک ہوتے ہیں۔ فلم کی دیگر کاسٹ میں گلشن گروور، نیرو باجوہ، جسمین، سلیم البیلا، ناصر چنیوٹی اور دانیل خاور شامل ہیں۔ پاکستان میں فلم کی نمائش سے قبل سندھ، پنجاب اور وفاقی سنسر بورڈز نے اسے کلیئرنس دی، جس کے بعد اسے باقاعدہ طور پر ریلیز کی اجازت ملی۔ ہانیہ عامر نے بھی انسٹاگرام پر فلم کے ایک پوسٹر کے ذریعے اس بات کی تصدیق کی کہ یہ فلم پاکستان کے مختلف بڑے شہروں میں نمائش کے لیے پیش کی جائے گی، جن میں کراچی، لاہور اور اسلام آباد کے بڑے سنیما گھر شامل ہیں۔ دوسری طرف، بھارت میں حالیہ کشیدہ حالات اور پاکستانی اداکارہ کی موجودگی کے سبب فلم کی نمائش روک دی گئی ہے۔ چند روز پہلے جب فلم کا ٹریلر جاری کیا گیا، تو سوشل میڈیا پر کچھ حلقوں کی جانب سے دلجیت دوسانجھ کو ہدفِ تنقید بنایا گیا، تاہم فلم کے بین الاقوامی مداحوں کی دلچسپی بدستور برقرار رہی۔ سردار جی 3 ایک روایتی کامیڈی فلم نہیں بلکہ اس میں ماضی، مافوق الفطرت عناصر اور ہلکی پھلکی سنجیدگی کو ایک ساتھ سمیٹا گیا ہے، جو اسے عام تفریحی فلموں سے مختلف بناتا ہے۔ یہ فلم نہ صرف شائقین کے لیے ایک نیا تجربہ ہے بلکہ اس میں ہانیہ عامر کا ایک بین الاقوامی سطح پر نمایاں قدم بھی دیکھا جا رہا ہے۔