فیس بک دوست سے ملنے کے لیے امریکی خاتون خیبر پختوںخوا کے ضلع دیر پہنچی ہیں۔پیر کو ضلع دیر سے تعلق رکھنے والے ساجد علی نے مقامی صحافیوں سے گفتگو میں بتایا کہ اُن کی امریکی خاتون راسموسین منڈی سے فیس بک پر دوستی ہوئی تھی۔’دوستی کے بعد انہوں نے پاکستان آنے اور ملنے کی خواہش ظاہر کی تو میں نے خوش آمدید کہا۔‘ضلع اپر دیر کی پولیس کے حکام کا کہنا ہے کہ 43 سالہ راسموسین منڈی اس وقت علاقے میں موجود ہیں۔ وہ 32 سالہ ساجد علی سے ملنے آئی ہیں۔‘پولیس حکام کے مطابق امریکی شہری کے پاس پاکستان کا 90 دن کا ٹورسٹ ویزہ موجود ہے۔ساجد علی نے مقامی میڈیا کو بتایا کہ ایک سال پہلے امریکی خاتون سے دوستی ہوئی تھی۔ تب خاتون نے خود مجھ سے شادی کا اظہارکیا جسے میں نے قبول کیا۔ان کا کہنا ہے کہ ’ابھی نکاح کرنے کا فیصلہ نہیں کیا مگر جب بھی خاتون کہیں گی ہم نکاح کرلیں گے۔‘ساجد علی نے کہا کہ ’ہم پشتون لوگ ہیں جو ہمیں پیار دے، جواب میں ہم بھی اسے پیار دیتے ہیں۔‘امریکی خاتون راسموسین منڈی نے ضلع دیر میں لوگوں کی مہمان نوازی پر خوشی کا اظہار کیا۔ان کا کہنا تھا کہ پہلی نظر میں ساجد علی کی ڈی پی تصویر دیکھ کر پیار ہوگیا تھا۔ ’ساجد پُرخلوص اور سلجھا ہوا شخص ہے، اس لیے اسے جیون ساتھی بنانے کا ارادہ کیا۔‘نوجوان ساجد علی کے مطابق اُن کی عمر 32 سال جبکہ امریکی خاتون کی عمر 43 برس ہے۔