کراچی کے علاقے ابراہیم حیدری میں پولیس نے کارروائی کرتے ہوئے خاتون سے مبینہ اجتماعی زیادتی اور ڈکیتی میں ملوث گروہ کے تین ملزمان کو گرفتار کرلیا۔ گرفتار افراد کی شناخت عادل، شیراز اور یاسر کے نام سے ہوئی ہے۔ پولیس کے مطابق کارروائی خفیہ اطلاعات اور ٹیکنیکل ذرائع کی مدد سے کی گئی، ملزمان سے ایک پستول بمعہ راؤنڈز برآمد ہوا ہے ۔ ملزمان نے نہ صرف گھر سے طلائی زیورات، نقدی اور قیمتی سامان لوٹا بلکہ خاتون کو مبینہ طور پر زیادتی کا نشانہ بھی بنایا۔ واردات کے دوران ملزمان نے خاتون کی بالیاں بھی زبردستی اتاریں اور موقع سے فرار ہو گئے۔ پولیس کا کہنا ہے کہ ابتدائی تفتیش میں ملزمان نے اپنے جرم کا اعتراف کر لیا ہے۔ ملزمان نے دوران تفتیش انکشاف کیا کہ اس وردات میں ان کے دو مزید ساتھی بھی شامل تھے، پولیس کی جانب سے گروہ کے دیگر دو ملزمان کی گرفتاری کے لیے مختلف مقامات پر چھاپے مارے جا رہے ہیں۔ پولیس کی جانب سے ضابطے کے تحت قانونی کاروائی عمل میں لائی جارہی ہے اور مزید تفتیش جاری ہے۔