کاؤنٹر ٹیررازم ڈیپارٹمنٹ (سی ٹی ڈی) نے کراچی میں کارروائی کرتے ہوئے قتل میں ملوث چار ملزمان کو گرفتار کرلیا۔ سی ٹی ڈی ترجمان کے مطابق گرفتار ملزمان محمد سجاد عرف شاوو، عبید علی عرف عبیدی، محمد عمیر اصغر اور شکیل احمد ٹرین کے ذریعے فرار ہونے کی کوشش کر رہے تھے۔ سی ٹی ڈی کا کہنا ہے کہ ملزمان 18 مئی 2025 کو ضلع بدین میں ہونے والے قتل کے واقعے میں ملوث تھے جس کا مقدمہ تھانہ بدین میں درج ہے۔کارروائی کے دوران واردات میں استعمال ہونے والا اسلحہ بھی برآمد کر لیا گیا ہے۔ ترجمان کے مطابق گرفتار ملزمان نے قتل سے قبل حیدرآباد میں قیام کیا اور مکمل ریکی کی۔ ابتدائی تفتیش میں انکشاف ہوا ہے کہ قتل کی اس واردات میں کالعدم علیحدگی پسند تنظیم کے ملوث ہونے کے شواہد بھی سامنے آئے ہیں۔ گرفتار ملزمان کئی دیگر سنگین مقدمات میں بھی مطلوب تھے اور ان کی گرفتاری تکنیکی شواہد اور حساس اداروں کی انٹیلیجنس معلومات کی بنیاد پر عمل میں لائی گئی۔ حکام کے مطابق ملزمان سے مزید تفتیش جاری ہے۔ دریں اثنا آئی جی سندھ نے سی ٹی ڈی کی جانب سے کارروائی کرنے والی ٹیم کے لیے انعام اور تعریفی اسناد کا اعلان بھی کیا۔