گھگر پھاٹک کے قریب میاں بیوی اور معصوم بچے کو تیز دھار آلے کےذریعے قتل کردیا گیا۔ پولیس کے مطابق مقتولین کا تعلق بلوچستان کے ڈسٹرکٹ لسبیلہ سے بتایا جا رہا ہے، قتل ہونے والوں میں 45 سالہ عبدالمجید، 40 سالہ سکینہ اور 6 سالہ عبدالنبی شامل ہیں ۔ پولیس کا کہنا ہے کہ میاں بیوی اور معصوم بچے کا قتل ابتدائی طور پر ذاتی دشمنی کا شاخسانہ معلوم ہوتا ہے تاہم پولیس اس سلسلے میں مزید تفتیش کر رہی ہے، مقتولین کا تعلق ودھو قوم سے بتایا جا رہا ہے۔ دریں اثناء وزیراعلیٰ سندھ سید مراد علی شاہ نے گھگر پھاٹک سے ملنے والی تین لاشوں کا نوٹس لیتے ہوئے واقعہ کی فوری تحقیقات کا حکم دے دیا۔ ترجمان کے مطابق وزیراعلیٰ نے گہناؤنے جرم کا ارتکاب کرنے والے عناصر کو ہر صورت کیفر کردار تک پہنچانے کی ہدایت کی ہے۔ انہوں نے آئی جی سندھ کو ہدایت کی ہے کہ قاتلوں کو فوری گرفتار کرکے رپورٹ پیش کی جائے۔