وفاقی دارالحکومت اسلام آباد اور راولپنڈی سمیت پاکستان کے کئی علاقوں میں زلزلے کے جھٹکے محسوس کیے گئے۔زلزلے کے یہ جھٹکے سنیچر اور اتوار کی درمیانی رات 12 بج کر 10 منٹ پر محسوس کیے گئے۔زلزلہ پیما مرکز کے مطابق ریکٹر سکیل پر زلزلے کی شدت 5.1 تھی اور اس کا مرکز روات سے جنوب مشرق میں 15 کلومیٹر کے فاصلے پر تھا جبکہ گہرائی 10 کلومیٹر تھی۔زلزلے کے جھٹکے محسوس ہوتے ہی لوگ کلمے کا ورد کرتے ہوئے گھروں سے باہر نکل آئے۔زلزلے کے جھٹکے اٹک، جہلم، چکوال، ہری پور، ایبٹ آباد،، مانسہرہ بٹگرام، مری، صوابی، سوات اور شانگلہ میں بھی محسوس کیے گئے۔اس کے علاوہ پاکستان کے زیرِانتظام کشمیر میں بھی زلزلے کے جھٹکے محسوس کیے گئے۔حکام کے مطابق ’زلزلے سے فوری طور پر کسی نقصان کی اطلاع موصول نہیں ہوئی۔‘واضح رہے کہ جمعے اور سنیچر کی درمیانی رات بھی پاکستان کے کئی علاقوں میں زلزلے کی جھٹکے محسوس کیے گئے تھے جن کی شدت 5.4 تھی۔