راولپنڈی تھانہ نیو ٹاؤن کی حدود میں پرائیوٹ سکیورٹی گارڈز نے کمرشل مارکیٹ میں فوڈ ڈلیوری بوائے پر تشدد کر کے قانون کی دھجیاں اڑا دیں جبکہ ہوائی فائرنگ کرکے خوف وہراس پھیلا دیا۔ راولپنڈی کی مصروف ترین شاہراہ سیٹلائیٹ ٹاؤن کمرشل مارکیٹ پرائیوٹ سکیورٹی گارڈز نے فوڈ ڈلیوری بوائے کو تشدد کا نشانہ بنایا، اطلاع ملتے ہی دیگر فوڈ ڈلیوری بوائے بھی مارکیٹ کے قریب جمع ہوگئے۔ اس دوران سکیورٹی گارڈز نے ہوائی فائرنگ بھی کی جس سے شاپنگ کے لیے نکلے شہری اور علاقہ مکین خوف زدہ ہوگئے۔ مزدور پر تشدد اور ہوائی فائرنگ کے دوران کمرشل مارکیٹ علاقہ غیر کا منظر پیش کرنے لگی۔ متاثرہ نوجوان کا کہنا ہے کہ جب ملزمان کے خلاف کارروائی کے لیے درخواست دی تو پولیس معاملے کو ٹال مٹول کررہی ہے اور مقدمہ درج نہیں کر رہی کیونکہ سکیورٹی گارڈز کی پشت پناہی راولپنڈی کی طاقت ور سیاسی شخصیت کر رہی ہے متاثرہ نوجوان نے آئی جی پنجاب، سی سی ڈی پنجاب، آر پی آو راولپنڈی، سی پی او راولپنڈی سے فوری نوٹس لینے اور قرار واقعی سزا دلوانے کی اپیل کی ہے۔ یاد رہے کہ پنجاب میں ڈالا کلچر، پرائیویٹ سکیورٹی گارڈ اور اسلحہ کی نمائش پر پابندی کی باوجود کمرشل مارکیٹ میں نجی سکیورٹی گارڈز کا اسلحہ کی نمائش اور فائرنگ کرکے خوف وہراس پھیلانا انتظامیہ کی رٹ چیلنج کرنے کے مترادف ہے۔