وفاقی دارالحکومت میں منظر عام پر آنے والے ٹک ٹاکر سامعہ حجاب ہراسگی کیس میں اہم پیش رفت سامنے آئی ہے۔ تھانہ شالیمار میں زیرِ حراست مرکزی ملزم حسن زاہد سے ہر قسم کی ملاقات پر مکمل پابندی عائد کر دی گئی ہے۔ پولیس ذرائع کے مطابق آئی جی اسلام آباد کی ہدایت پر یہ فیصلہ کیا گیا ہے کہ ملزم سے نہ تو والدین اور نہ ہی کوئی اور شخص ملاقات کر سکے گا۔ حسن سے ملنے کےلیے آنے والے ہر ملاقاتی کو بتایا جا رہا ہے کہ اعلیٰ سطحی احکامات کے مطابق ملاقات کی اجازت نہیں دی جا سکتی۔ ذرائع کا کہنا ہے کہ یہ اقدام گزشتہ روز ہونے والے ایک انٹرویو کے بعد اٹھایا گیا تاکہ تفتیش کا عمل متاثر نہ ہو اور کیس کے حوالے سے شفاف تحقیقات یقینی بنائی جا سکیں۔