پاکستانی شوبز انڈسٹری کی معروف اداکارہ سارہ خان نے سوشل میڈیا پر مداحوں کے مختلف سوالات کے جواب دیتے ہوئے اپنی خاندانی زندگی سے متعلق کئی دلچسپ باتیں شیئر کیں۔ انسٹاگرام پر سوال و جواب کے سیشن کے دوران ایک مداح نے پوچھا کہ کیا وہ دوسری بار ماں بننے کے دوران بیٹے کی خواہش رکھتی تھیں؟ اس پر سارہ خان نے مختصر مگر واضح جواب دیتے ہوئے کہا کہ ان کی خواہش صرف ایک صحت مند بچے کی تھی، لڑکا یا لڑکی ان کے لیے اہم نہیں تھا۔ ایک اور سوال کے جواب میں اداکارہ نے بتایا کہ شادی اور بچوں کے بعد اگر کسی چیز کی سب سے زیادہ کمی محسوس ہوتی ہے تو وہ بلا تعطل اور سکون سے سونا ہے۔ انہوں نے کہا کہ دو بیٹیوں کی ماں ہونے کے بعد پرسکون نیند اب ایک یاد بن کر رہ گئی ہے۔ جب ایک مداح نے فیفا ورلڈ کپ کے بارے میں پوچھا تو سارہ خان نے ہنستے ہوئے کہا کہ آج کل ان کی پوری توجہ صرف اپنی دونوں بیٹیوں پر ہے۔ بیٹیوں کی آمد کے بعد زندگی میں آنے والی تبدیلی کے بارے میں بات کرتے ہوئے اداکارہ نے کہا کہ ان کی زندگی پہلے سے کہیں زیادہ خوبصورت اور مصروف ہوگئی ہے۔ ان کے مطابق یہ ان کی زندگی کا سب سے خوشگوار دور ہے اور وہ اپنی دونوں بیٹیوں کو اللہ تعالیٰ کی بہت بڑی نعمت سمجھتی ہیں۔ سارہ خان نے اپنی گفتگو کے اختتام پر دعا کی کہ اللہ تعالیٰ ہر شادی شدہ جوڑے کو صحت مند اور نیک اولاد کی نعمت عطا فرمائے۔ واضح رہے کہ سارہ خان اور گلوکار فلک شبیر نے جولائی 2020 میں شادی کی تھی اور وہ دو بیٹیوں عالیانہ فلک اور رانیا فلک کے والدین ہیں۔