گڈز ٹرانسپورٹرز نے بڑھتے ہوئے آپریشنل اخراجات کے باعث مال برداری کے کرایوں میں 15 فیصد اضافے کا اعلان کرتے ہوئے حکومت کو مطالبات کی منظوری کے لیے الٹی میٹم دے دیا ہے۔ گڈز ٹرانسپورٹ الائنس کے صدر ملک شہزاد اعوان نے کہا ہے کہ اگر حکومت نے ٹول ٹیکس اور ودہولڈنگ ٹیکس واپس نہ لیے تو ملک بھر میں پہیہ جام ہڑتال کی جائے گی۔ انہوں نے مطالبہ کیا کہ ٹرانسپورٹ سیکٹر کو فوری ریلیف فراہم کیا جائے تاکہ کاروباری سرگرمیاں متاثر نہ ہوں۔ ملک شہزاد اعوان کا کہنا تھا کہ حکومتی پالیسیوں اور بڑھتے ہوئے اخراجات کے باعث گاڑیاں چلانا مشکل ہو گیا ہے، جبکہ ٹرانسپورٹ کا شعبہ شدید مالی دباؤ کا شکار ہے۔ انہوں نے کہا کہ اگر مطالبات تسلیم نہ کیے گئے تو ملک گیر ہڑتال سمیت آئندہ کے لائحہ عمل کا اعلان کیا جائے گا۔ انہوں نے مزید کہا کہ سپلائی چین کو برقرار رکھنے کے لیے حکومت کو فوری اور مؤثر اقدامات کرنا ہوں گے۔ ان کے مطابق دسمبر میں حکومت کی جانب سے کیے گئے وعدوں پر تاحال عمل درآمد نہیں ہوا، جس کے باعث ٹرانسپورٹرز میں شدید تشویش پائی جاتی ہے۔