ملک میں مہنگائی کے مسلسل بڑھتے ہوئے اثرات کے باعث چکن، بیف اور مٹن کی قیمتیں عوام کی قوتِ خرید سے باہر ہونے لگی ہیں، جس پر شہریوں نے شدید تشویش کا اظہار کیا ہے۔ مارکیٹ ذرائع کے مطابق لاہور میں برائلر چکن 500 روپے فی کلو جبکہ بیف 1500 روپے فی کلو فروخت ہو رہا ہے۔ دوسری جانب اوپن مارکیٹ میں مٹن کی قیمت 3200 سے 3500 روپے فی کلو تک پہنچ گئی ہے۔ شہریوں کا کہنا ہے کہ روزمرہ اشیائے ضروریہ کی بڑھتی ہوئی قیمتوں نے گھریلو بجٹ بری طرح متاثر کر دیا ہے۔ ان کے مطابق مٹن اور بیف پہلے ہی عام آدمی کی دسترس سے باہر تھے، اب برائلر چکن بھی خریدنا مشکل ہوتا جا رہا ہے۔ عوام نے حکومت سے مطالبہ کیا ہے کہ گوشت کی بڑھتی ہوئی قیمتوں پر قابو پانے کے لیے مؤثر اقدامات کیے جائیں تاکہ عام شہریوں کو ریلیف فراہم کیا جا سکے۔