نیشنل چیمپئینز کپ 11 سے 18 اگست تک ملتان میں کھیلا جائے گا، جس کے لیے قومی کرکٹرز ملتان میں رپورٹ کریں گے۔ ٹورنامنٹ میں حصہ لینے والی چار ٹیمیں پاکستان گرینز، پاکستان وائٹس، پاکستان بلیوز اور پاکستان گولڈ ایونٹ کے آغاز سے قبل دو روز تک ٹریننگ سیشنز میں حصہ لیں گی۔ اس ایونٹ میں وائٹ بال کرکٹ کے سرکردہ کھلاڑی میدان میں اتریں گے۔ ٹیموں کی قیادت کے لیے شاداب خان کو پاکستان گرینز، صائم ایوب کو پاکستان وائٹس، صاحبزادہ فرحان کو پاکستان بلیوز اور شاہین شاہ آفریدی کو پاکستان گولڈ کی ذمہ داری سونپی گئی ہے۔ نیشنل چیمپئینز کپ کے انعقاد کا بنیادی مقصد آئی سی سی ورلڈ کپ 2027 کے لیے 22 سے 25 کھلاڑیوں کا ایک مضبوط اور باصلاحیت پول تیار کرنا ہے تاکہ مستقبل کی قومی ٹیم کے لیے بہترین کھلاڑیوں کا انتخاب ممکن ہوسکے۔