پاکستان کی سینئر اور ورسٹائل اداکارہ، مصنفہ و سماجی کارکن بشریٰ انصاری نے بھارتی مصنف جاوید اختر کو ان کی اوقات یاد دلادی۔ پاکستان کی سینئر اداکارہ بشریٰ انصاری ان دنوں یورپ کے دورے پر ہیں، جہاں سے اُنہوں نے بھارت کی جانب سے مقبوضہ کشمیر میں جعلی کارروائیوں اور پاکستان مخالف بیانات پر دو ٹوک موقف اختیار کیا اور جاوید اختر کو جھوٹے الزامات لگانے پر آئینہ دکھا دیا۔پاکستان کی سینئر اداکارہ نے انسٹا گرام پر ایک ویڈیو بیان جاری کرتے ہوئے کہا کہ کیا ڈرامہ چلا رکھا ہے بھارت نے؟ پہلے اپنی ناکام پالیسیاں دیکھو۔ پاکستان میں ان عورتوں کو واپس دھکیلا جا رہا ہے جو 40 سال سے بھارت میں رہ رہی تھیں، تم نے انہیں ویزے دیے ہی کیوں تھے؟‘جاوید اختر کو آڑے ہاتھوں لیتے ہوئے اُن کا کہنا تھا کہ ’تم تو اللّٰہ پر یقین بھی نہیں رکھتے اور پاکستان کے خلاف زبان چلاتے ہو، عجیب شخص ہو، مرنے کے قریب ہو اور اب بھی باز نہیں آ رہے، کم از کم نصیر الدین شاہ کی طرح خاموشی اختیار کرلو۔پاکستان کی سینئر اداکارہ نے بھارتی میڈیا کو بھی تنقید کا نشانہ بنایا اور اینکر ارناب گوسوامی کو چیخنے والا ذہنی مریض قرار دیا اور ان ریٹائرڈ بھارتی فوجی افسران کو بھی تنقید کا نشانہ بنایا جو ہر وقت پاکستان کے خلاف زہر اگلتے ہیں۔اداکارہ نے کہا کہ میری یورپ میں ایک بھارتی لڑکی سے ملاقات ہوئی، وہ بہت محبت سے ملی، اصل میں نفرتیں عوام میں نہیں، مخصوص افراد لوگوں کے ذہنوں کو زہر آلود کرتے ہیں۔بشریٰ انصاری کے اس دلیرانہ موقف کو سوشل میڈیا پر خوب پذیرائی مل رہی ہے، ان کے چاہنے والوں نے جرأت، اندازِ بیاں اور وطن سے محبت پر انہیں خراجِ تحسین پیش کیا۔