’کانٹا لگا‘ گانے سے مشہور ہونے والی 42 سالہ انڈین اداکارہ شفالی جریوالا جمعے کو ممبئی میں چل بسیں لیکن ابھی تک ان کی اچانک موت کی وجہ معلوم نہیں ہوسکی۔انڈین نیوز چینل این ڈی ٹی وی کے مطابق ان کے شوہر نے انہیں فوری طور پر قریبی ہسپتال پہنچایا لیکن ڈاکٹروں نے بتایا کہ ہسپتال پہنچنے سے قبل ہی ان کی موت ہو چکی تھی۔موت کی وجہ جاننے کے لیے ان کی لاش کو پوسٹ مارٹم کے لیے بھجوایا گیا ہے۔شفالی جریوالا کو 2002 میں ’کانٹا لگا‘ گانے سے شہرت ملی اور اس کے بعد انہوں نے ریئلٹی شو ’بگ باس 13‘ میں بھی کام کیا۔ وہ 2004 میں سلمان خان کی فلم ’مجھ سے شادی کرو گی‘ میں بھی نظر آئیں۔ان کی اچانک موت پر سوشل میڈیا پر ان کے مداحوں نے حیرت اور صدمے کا اظہار کیا ہے۔سوشل میڈیا پلیٹ فارم ایکس پر ریتیکا نامی صارف نے لکھا کہ ’زندگی غیرمتوقع ہے۔ اگر آپ صحت مند ہیں تو یہ ایک ایسی چیز ہے جس کے لیے لاکھوں لوگ دعائیں کر رہے ہوں گے۔‘سوائپ ٹو وائرل نے لکھا کہ ’پہلے سدھارتھ شکلا اور اب شفالی جریوالا۔ کچھ غلط ہے۔ وہ جوان اور صحت مند تھے اور اچانک دل کا دورہ پڑ گیا۔‘ایک صارف نے لکھا کہ ’وہ بہت جلد چلی گئیں۔‘فلم فیئر ویب سائٹ نے اپنے ایکس ہینڈل پر شفالی کے شوہر کی ہسپتال سے نکلتے ہوئے ویڈیو شییئر کرتے ہوئے لکھا ’شفالی جریوالا دل کے دورے کے باعث چل بسیں۔ ان کے شوہر پراگ تیاگی ہسپتال سے نکلتے ہوئے تباہ حال اور افسردہ نظر آئے۔ ہم اہل خانہ سے دلی افسوس کا اظہار کرتے ہیں۔‘جنی نامی صارف نے لکھا ’اس نے زندگی کو جیا، ہنسی، پیار کیا اور اب وہ میڈیا کے لیے ایک کہانی بن گئیں۔ فارینزک، پولیس اور رپورٹروں کی بھیڑ، زندگی غیرمتوقع ہونے کے باعث خوفناک ہے۔‘