کراچی کے علاقے جوہر بھٹائی آباد کے ایک گھر میں چھریوں کے وار سے تین خواتین جاں بحق بچی سمیت تین افراد زخمی ہو گئے۔ پولیس کے مطابق جاں بحق ہونے والی خواتین کی شناخت مینہ، ایشا اور دانیہ کے ناموں سے ہوئی ہے جبکہ شدید زخمی ہونے والی بچی کی شناخت 14 سالہ نندنی، ایک خاتون اور ایک مرد کی شناخت اجے کے نام سے ہوئی ہے۔ زخمیوں کو تشویشناک حالت میں جناح اسپتال منتقل کیا گیا ہے پولیس اور تفتیشی ٹیمیں جائے وقوع پر پہنچ گئی ہیں اور واقعے کی تحقیقات جاری ہیں۔ پولیس نے زخمی ہونے والی بچی نندنی کا بیان قلمبند کرلیا ہے۔ پولیس کا کہنا ہے کہ زخمی نندنی کے بیان کے مطابق زخمی شخص اجے بچی کاماموں ہے جو واقعے میں ملوث ہے۔ اجے نے تینوں خواتین کو قتل کیا اور بچی کو زخمی بھی کیا بعد ازاں ملزم نے خود کشی کی کوشش کی۔ دیگر اہلخانہ نے بھی پولیس کو بیان دیا ہے جس میں ان کا کہنا تھا کہ اجے نشے کا عادی نہیں ہے اور کافی عرصہ سے بیروزگار تھا۔