بھارت کے معروف اداکار ستیش شاہ، جو ٹی وی ڈرامہ سربھائی ورسز سربھائی کے یادگار کردار اور فلموں جانے بھی دو یارو اور میں ہوں نا میں اپنی شاندار اداکاری کے باعث پہچانے جاتے تھے، ہفتے کے روز 74 برس کی عمر میں انتقال کر گئے۔ میڈیا رپورٹس کے مطابق ستیش شاہ نے دوپہر تقریباً ڈھائی بجے ممبئی کے ہندوجا اسپتال میں آخری سانس لی، جہاں وہ گردوں سے متعلق پیچیدگیوں کے باعث زیرِ علاج تھے۔ بتایا گیا ہے کہ انہوں نے حال ہی میں گردے کی پیوند کاری (کڈنی ٹرانسپلانٹ) کروائی تھی۔ اداکار کے مینیجر نے ان کے انتقال کی تصدیق کرتے ہوئے بتایا کہ آخری رسومات اتوار کو ادا کی جائیں گی۔ فلمی اور ٹی وی دنیا میں ستیش شاہ کے انتقال پر گہرے دکھ اور افسوس کا اظہار کیا جا رہا ہے۔ وہ اپنی مزاحیہ اداکاری، شاندار ٹائمنگ اور منفرد کرداروں کے باعث ناظرین کے دلوں میں ایک خاص مقام رکھتے تھے۔ فلم ساز اشوک پنڈت نے سماجی رابطے کی ویب سائٹ ایکس (سابقہ ٹوئٹر) پر افسوس کا اظہار کرتے ہوئے لکھا، “یہ بتاتے ہوئے دکھ ہو رہا ہے کہ معروف اداکار اور نہایت اچھے انسان ستیش شاہ کا ایک گھنٹہ قبل گردوں کے فیل ہونے کی وجہ سے انتقال ہو گیا ہے۔ یہ انڈسٹری کے لیے ایک بڑا نقصان ہے۔ ستیش شاہ کا فنی سفر چار دہائیوں سے زائد عرصے پر محیط تھا۔ انہوں نے ٹیلی ویژن اور فلموں دونوں میں اپنی اداکاری سے ناقابلِ فراموش نقوش چھوڑے۔ ان کا انتقال بھارتی تفریحی صنعت کے ایک سنہری دور کے اختتام کے مترادف ہے، اور وہ ایک ایسی میراث چھوڑ گئے ہیں جو آنے والے وقتوں تک یاد رکھی جائے گی۔