"رشتے پیشے کی وجہ سے نہیں بلکہ ذاتی وجوہات کی بنا پر بنتے اور ٹوٹتے ہیں۔ ہم نے بہت سے لوگوں کو دیکھا ہے جو ساری زندگی کام کرتے رہے اور آج بھی خوشحال ازدواجی زندگی گزار رہے ہیں۔ سب سے بڑی مثال شاہ رخ خان ہیں جن کی شادی آج بھی بہترین چل رہی ہے۔ طلاق صرف شوبز میں نہیں ہوتی، عام زندگی میں بھی ایسا ہوتا ہے، یہ ایک عام سماجی عمل ہے۔" پاکستانی اداکار حارث وحید نے ایک تازہ انٹرویو میں اپنی زندگی اور شادی کے حوالے سے کھل کر بات کی۔ وہ یوٹیوب شو سم تھنگ ہوٹ میں آمنہ عیسانی کے ساتھ گفتگو کر رہے تھے، جہاں انہوں نے اداکاروں کی شادیاں کم عرصہ چلنے کی وجوہات پر روشنی ڈالی۔ حارث وحید، جو ڈراموں جانِ جہاں، تمہارے حسن کے نام، سمی، محبت چھوڑی میں نے اور پامال میں اپنی زبردست اداکاری سے پہچانے جاتے ہیں، اپنی سابقہ شادی کے حوالے سے بھی کھل کر بولے۔ یاد رہے کہ ان کی شادی 2018 میں اداکارہ مریم فاطمہ سے ہوئی تھی، تاہم دونوں 2022 میں علیحدہ ہوگئے۔ انہوں نے بتایا کہ لوگ اکثر سمجھتے ہیں کہ شوبز میں تعلقات اس لیے ٹوٹ جاتے ہیں کیونکہ یہ فیلڈ چمک دمک سے بھری ہے، مگر حقیقت اس کے برعکس ہے۔ ان کے مطابق ازدواجی رشتے صرف شہرت یا پیشے سے متاثر نہیں ہوتے بلکہ ان کے پیچھے بہت سی ذاتی وجوہات کارفرما ہوتی ہیں۔ بات چیت کے دوران انہوں نے ایک اہم نکتہ یہ بھی اٹھایا کہ عوام کو اپنے پسندیدہ فنکاروں کی ذاتی زندگی کے بارے میں حد سے زیادہ تجسس نہیں رکھنا چاہیے۔ انہوں نے کہا، "مشہور شخصیات بھی انسان ہیں۔ وہ جو اپنی زندگی کے بارے میں بتانا چاہیں، بس وہی کافی ہونا چاہیے۔" آخر میں حارث نے کہا کہ ہر انجام برا نہیں ہوتا، "کبھی کبھار چھوڑ دینا ہی بہتر ہوتا ہے۔" یہ گفتگو نہ صرف ان کے مداحوں کے لیے ایک جھلک ہے کہ وہ زندگی کو کتنے پختہ انداز میں دیکھتے ہیں، بلکہ ایک پیغام بھی ہے کہ شہرت کے پیچھے بھی عام انسانوں جیسے جذبات اور دکھ چھپے ہوتے ہیں۔