محکمہ موسمیات نے کراچی سمیت سندھ کے بیشتر اضلاع میں آج سے 12 جون تک گرمی کی لہر کی پیش گوئی کرتے ہوئے شہریوں کو احتیاطی تدابیر اختیار کرنے کی ہدایت کی ہے۔
محکمہ موسمیات کے مطابق کراچی میں آج موسم شدید گرم رہنے کا امکان ہے اور درجہ حرارت 38 ڈگری سینٹی گریڈ تک پہنچ سکتا ہے۔ آئندہ 24 گھنٹوں کے دوران شہر کا موسم گرم اور مرطوب رہے گا۔
شہر قائد میں کم سے کم درجہ حرارت 30 ڈگری سینٹی گریڈ ریکارڈ کیا گیا جبکہ ہوا میں نمی کا تناسب 72 فیصد ہے، جس کے باعث گرمی کی شدت زیادہ محسوس کی جا سکتی ہے۔
محکمہ موسمیات کا کہنا ہے کہ سمندری ہوائیں 15 کلومیٹر فی گھنٹہ کی رفتار سے چل رہی ہیں، تاہم شدید گرمی کے دوران شہریوں کو غیر ضروری طور پر دھوپ میں نکلنے سے گریز اور پانی کا زیادہ استعمال کرنے کا مشورہ دیا گیا ہے۔