ایران کی پاسدارانِ انقلاب نے دعویٰ کیا ہے کہ انہوں نے اسرائیلی فضائیہ کے تل نوف اور نواتیم ایئربیسز کو نشانہ بنایا ہے۔ ایرانی خبر رساں ادارے کے مطابق پاسدارانِ انقلاب کے شعبہ تعلقاتِ عامہ نے بتایا کہ یہ کارروائی سوموار کی صبح کی گئی، جس میں اسرائیلی فضائیہ کے اہم فوجی اڈوں کو ہدف بنایا گیا۔ @@3888213@@ خبر ایجنسی تسنیم کے مطابق پاسدارانِ انقلاب نے اپنے بیان میں کہا ہے کہ یہ کارروائی اسرائیل کی جانب سے ایران میں متعدد ریڈار تنصیبات پر کیے گئے میزائل حملوں کے جواب میں کی گئی ہے۔ ایرانی پاسدارانِ انقلاب نے مزید کہا کہ اسرائیلی جارحیت کے جواب میں فوری کارروائی اور اہداف کے دائرہ کار کو وسعت دینا اس مرحلے میں ان کی حکمت عملی کا حصہ ہے۔ بیان میں خبردار کیا گیا کہ یہ کارروائی ایک وارننگ ہے اور اگر جارحیت دہرائی گئی تو مزید سخت اور تباہ کن جواب دیا جائے گا۔ دوسری جانب عرب میڈیا رپورٹس کے مطابق ایرانی حملوں کے بعد تل ابیب میں دھماکوں کی آوازیں سنی گئیں جبکہ میزائل کے ٹکڑے وسطی اسرائیل کے مختلف علاقوں میں گرنے کی اطلاعات ہیں۔ رپورٹس کے مطابق حملوں کے بعد اسرائیل کے بن گوریان ایئرپورٹ پر ایمرجنسی نافذ کردی گئی ہے۔ خطے میں تازہ کشیدگی کے بعد صورتحال مزید سنگین ہونے کا خدشہ ظاہر کیا جارہا ہے۔