بین الاقوامی برادری نے مشرقِ وسطیٰ میں بڑھتی ہوئی کشیدگی اور جنگ بندی کی خلاف ورزیوں پر گہری تشویش کا اظہار کرتے ہوئے فریقین پر تحمل اور مذاکرات کی راہ اختیار کرنے پر زور دیا ہے۔ کیئر اسٹارمر نے بھی اسرائیل اور ایران سے جنگ بندی کی طرف واپس آنے کی اپیل کی ہے۔ انہوں نے کہا کہ موجودہ کشیدگی کے اثرات عالمی سطح پر محسوس کیے جا رہے ہیں اور اس صورتحال سے برطانیہ بھی متاثر ہو رہا ہے۔ ان کا کہنا تھا کہ مشرقِ وسطیٰ میں لڑائی کے دوبارہ آغاز پر شدید تشویش پائی جاتی ہے۔ ادھر کایا کالاس نے کہا کہ مشرقِ وسطیٰ میں تشدد کا سلسلہ فوری طور پر رکنا چاہیے۔ انہوں نے فریقین پر زور دیا کہ وہ مذاکرات اور سفارتی ذرائع کو ترجیح دیں اور مزید کشیدگی سے گریز کریں۔ عالمی رہنماؤں کے بیانات ایسے وقت میں سامنے آئے ہیں جب خطے میں امن و استحکام کے حوالے سے خدشات بڑھ رہے ہیں اور بین الاقوامی برادری صورتحال کو قریب سے مانیٹر کر رہی ہے۔