ایران اور اسرائیل کے ایک دوسرے پر حملوں کے باعث جنگ بندی متاثر ہونے کے خدشات کے پیش نظر عالمی مارکیٹ میں خام تیل کی قیمتیں بڑھ گئی ہیں، جس کے تحت برینٹ خام تیل 98 ڈالر اور ڈبلیو ٹی آئی (WTI) 95 ڈالر فی بیرل پر ٹریڈ کر رہا ہے۔ دوسری جانب، اس صورتحال کی وجہ سے عالمی اسٹاک مارکیٹوں میں شدید مندی دیکھی جا رہی ہے جہاں کوریا کے کاسپی انڈیکس میں 8 فیصد سے زائد اور جاپان کے نکئی انڈیکس میں 3 فیصد سے زائد کی نمایاں کمی ریکارڈ کی گئی ہے۔ @@3888221@@ اس کے ساتھ ہی جرمنی، فرانس، برطانیہ، ہانگ کانگ اور بھارت کی اسٹاک مارکیٹوں میں بھی گراوٹ اور مندی کا رجحان غالب ہے۔ دوسری جانب امریکی صدر ڈونلڈ ٹرمپ نے ایران اور اسرائیل سے ایک دوسرے پر حملے فوری طور پر روکنے کا مطالبہ کردیا۔ سوشل میڈیا پر جاری بیان میں امریکی صدر نے لکھا ایران اور اسرائیل فوری طور پر حملے روکیں۔ $$3888265$$ مزید برآں ترجمان چینی وزارت خارجہ نے مشرق وسطیٰ کی تازہ ترین صورتحال پر گہری تشویش کا اظہار کرتے ہوئے کہا کہ دشمنی کا دوبارہ آغاز کسی بھی فریق کے مفاد میں نہیں ہے، امید ہے کہ اسرائیل اور ایران جنگ بندی برقرار رکھیں گے۔ یاد رہے کہ ایران اور اسرائیل کے درمیان گزشتہ روز سے ایک دوسرے پر متعدد حملے کیے جاچکے ہیں۔ امریکی صدر ڈونلڈ ٹرمپ نے اسرائیلی وزیراعظم بنیامین نیتن یاہو کو ٹیلی فون کر کے خبردار کیا تھا کہ اگر اسرائیل نے ایران پر حملہ کیا تو امریکا اسرائیل کا ساتھ نہیں دے گا تاہم صیہونی وزیراعظم نے صدر ٹرمپ کے فون کے کچھ ہی گھنٹے پر ایران پر میزائلوں کی بارش کردی، ایران کی جانب سے بھی بھرپور جوابی حملے کیے جارہے ہیں۔