سعودی عرب نے عمرہ زائرین کے لیے ایک سالہ ملٹی پل انٹری عمرہ ویزا متعارف کرا دیا، جس کے تحت زائرین ایک ہی ویزے پر سال بھر میں متعدد مرتبہ عمرہ کی ادائیگی کے لیے سعودی عرب کا سفر کرسکیں گے۔
نئے ویزا نظام کے مطابق ویزا جاری ہونے کی تاریخ سے 365 دن تک مؤثر رہے گا، جبکہ اس مدت کے دوران زائرین مجموعی طور پر 90 روز تک سعودی عرب میں قیام کرسکیں گے۔
سعودی حکام کے مطابق اس سہولت کا مقصد عمرہ زائرین کے لیے سفری عمل کو آسان بنانا اور انہیں ایک ہی ویزے پر بار بار آمد و رفت کی سہولت فراہم کرنا ہے۔
تاہم واضح کیا گیا ہے کہ اس ملٹی پل انٹری ویزے کے ذریعے حج سیزن کے دوران سعودی عرب میں داخلے کی اجازت نہیں ہوگی اور حج کے لیے متعلقہ ضوابط اور الگ ویزا پالیسی بدستور نافذ العمل رہے گی۔