وزیراعظم محمد شہباز شریف سے نو منتخب وزیر اعلیٰ گلگت بلتستان امجد حسین نے ملاقات کی، جس میں گلگت بلتستان کے امور اور ترقیاتی منصوبوں پر تفصیلی تبادلہ خیال کیا گیا۔ ملاقات کے دوران وزیراعظم نے امجد حسین کو وزیر اعلیٰ گلگت بلتستان کا منصب سنبھالنے پر مبارکباد دیتے ہوئے نیک خواہشات کا اظہار کیا۔ وزیراعظم شہباز شریف نے کہا کہ وفاقی حکومت گلگت بلتستان کے عوام کی فلاح و بہبود کے لیے نو منتخب حکومت کے ساتھ مل کر کام کرنے کے لیے پرعزم ہے۔ انہوں نے کہا کہ حکومت قابلِ تجدید توانائی، سیاحت، انفراسٹرکچر، صحت، تعلیم اور دیگر شعبوں میں ترقیاتی منصوبوں پر عمل درآمد کر رہی ہے تاکہ علاقے میں پائیدار ترقی کو فروغ دیا جا سکے۔ وزیراعظم کے مطابق وفاقی حکومت کے اہم منصوبوں میں 100 میگاواٹ شمسی توانائی کا منصوبہ اور دانش اسکولوں کا قیام سرفہرست ہیں، جبکہ گلگت کے شہریوں کو جدید سہولیات کی فراہمی کے لیے پاکستان آسان خدمت سینٹر قائم کرنے کی منصوبہ بندی بھی کی جا رہی ہے۔ ملاقات میں نائب وزیراعظم و وزیر خارجہ محمد اسحاق ڈار، وفاقی وزیر منصوبہ بندی احسن اقبال اور وفاقی وزیر اقتصادی امور احد خان چیمہ بھی شریک تھے۔