بلوچستان سے تعلق رکھنے والی معروف لوک گلوکارہ مائی صوبھائی کو ڈیرہ بگٹی میں فائرنگ کرکے قتل کردیا گیا، جس کے بعد ایک اور باصلاحیت خاتون صنفی تشدد کا نشانہ بن کر جان سے ہاتھ دھو بیٹھی۔ مائی صوبھائی ڈیرہ بگٹی کے بگٹی قبیلے سے تعلق رکھتی تھیں اور انہیں قبیلے کی پہلی خاتون گلوکارہ ہونے کا اعزاز حاصل تھا، جو مقامی لوک موسیقی کے ذریعے اپنی صلاحیتوں کا اظہار کرتی تھیں۔ نجی چینل کے مطابق مسلح افراد مائی صوبھائی کو قتل کرنے کی غرض سے ان کے پاس پہنچے اور فائرنگ کردی۔ فائرنگ کے نتیجے میں وہ موقع پر ہی جاں بحق ہوگئیں، جبکہ حملہ آور واردات کے بعد فرار ہوگئے۔ واقعے کے بعد پولیس نے تحقیقات شروع کردی ہیں، تاہم قتل کی وجوہات اور ملزمان کے حوالے سے تاحال کوئی حتمی رپورٹ سامنے نہیں آئی۔ خواتین کے خلاف تشدد کے بڑھتے ہوئے واقعات نے ایک بار پھر معاشرے میں خواتین کے تحفظ اور ان کے بنیادی حقوق سے متعلق سنگین سوالات اٹھا دیے ہیں۔