واقعہ اداکارہ زارا نور عباس کی فلم شیروز کے پریمیئر کے موقع پر پیش آیا، جہاں اسد صدیقی اپنی اہلیہ اور والدہ کے ہمراہ پہنچے تھے۔ تقریب میں ان کی والدہ بھی اپنی بہو کی نئی فلم کی خوشی میں شریک ہونے آئی تھیں۔ سوشل میڈیا پر گردش کرنے والی ویڈیو میں دیکھا جاسکتا ہے کہ اسد اپنی اہلیہ زارا نور عباس کا ہاتھ تھام کر آگے بڑھ رہے ہیں جبکہ ان کی والدہ چند قدم پیچھے اکیلی چل رہی ہوتی ہیں۔ اسی دوران وہ اچانک توازن کھو کر زمین پر گر جاتی ہیں۔ والدہ کو گرتے دیکھ کر اسد فوراً اہلیہ کا ہاتھ چھوڑ کر ان کی جانب دوڑتے ہیں اور انہیں اٹھانے میں مدد کرتے ہیں۔ اس موقع پر اداکارہ میرب علی سمیت وہاں موجود دیگر افراد بھی آگے بڑھ کر بزرگ خاتون کو سنبھالتے ہیں جس کے بعد اسد اپنی والدہ کو سہارا دے کر اندر لے جاتے ہیں۔ View this post on Instagram A post shared by Amna Rasool (@allpakshowbizstarz) تاہم ویڈیو سامنے آنے کے بعد صارفین کی بڑی تعداد نے اداکار کے رویے پر اعتراض اٹھایا۔ ان کا کہنا تھا کہ اسد کو اپنی اہلیہ کے بجائے والدہ کے ساتھ چلنا چاہیے تھا کیونکہ بڑھتی عمر میں بزرگ افراد کو چلنے پھرنے کے دوران زیادہ احتیاط اور مدد کی ضرورت ہوسکتی ہے۔ بعض صارفین نے تقریب میں موجود دیگر افراد کے ردعمل پر بھی سوالات اٹھائے، جبکہ چند لوگوں نے اس بات کی نشاندہی کی کہ اسد نے والدہ کو گرتے ہی فوری طور پر مدد فراہم کی۔ تاہم ایک مختصر ویڈیو کی بنیاد پر کسی کے رویے یا نیت کے بارے میں حتمی رائے قائم کرنا مشکل ہے۔ واضح رہے کہ اسد صدیقی گزشتہ تقریباً 16 برس سے پاکستانی شوبز انڈسٹری سے وابستہ ہیں۔ وہ سرخ چاندنی، بسمِل، حابل اور قابل، صنفِ آہن، بالا اور پریستان سمیت کئی معروف ڈراموں میں اداکاری کرچکے ہیں، جبکہ حال ہی میں ڈرامہ سیریل شکنجہ میں بھی ان کی کارکردگی کو پسند کیا گیا۔ اسد صدیقی اور زارا نور عباس پاکستانی شوبز کی معروف جوڑیوں میں شمار ہوتے ہیں اور دونوں ایک بیٹی نورِ جہاں کے والدین ہیں۔ اس واقعے کی ویڈیو نے سوشل میڈیا پر بزرگ والدین کی دیکھ بھال اور ان کے ساتھ برتاؤ کے حوالے سے ایک نئی بحث چھیڑ دی ہے۔